10 TYLLI KI DAW KUMNO BAN SHANIAH HA U BLEI

Ioh lehse don ki por ha ka jingiaid lynti jong phi phi iaid lyngba shibun ki jingeh bad ki jingialeh bad phi kum klet ban shaniah lut ha U Blei. Phi shaniah ha ka Eroplen, haba phim ithuh ia u nongniah Eroplen. Phi shaniah ha ka lieng, haba phim ithuh ia U nongniah lieng. Phi shaniah ha ka Bus ( Ka kali kit briew ), haba phim ithuh ia U nongniah Bus. Lada ngi lah ban shaniah ha kine kiei kiei ki jingthoh kiba haneng, Balei ngim ban shaniah bad ban pynjahthait ia ka jingim ha U Blei Uba tip lut bad Uba synshar lut ia kiei kiei baroh ? Ka Ktien jong U Blei ka ong na ka kitab jong u Jeremaiah, Suk uta u briew uba shaniah ha U Trai, bad uba ka jingshaniah jong u long U Trai. Naba un long kum u dieng ba la thung hajan ki um, bad uba pur ïa la ki thied hajan ka wah, ba un ym sheptieng haba wan ka jingshit, hynrei, ka sla jong u kan long jyrngam; bad ha ka snem barang ryngkhiang un ym sumar khuslai, lymne un ym pep ban sei soh (Jeremaiah 17:7). Kumjuh ruh ka Salm kaba 5 dkhot kaba 11 bad Salm kaba 125 dkhot kaba nyngkong ka ong; Hynrei, kita baroh kiba shaniah ha me to kin ïakmen, ai ba kin risa namar ba kmen ha la ka sngi, namar ba me da ïa ki: kita ruh kiba ieit ïa ka kyrteng jong me to kin ïa shadkmen ha me. Kita kiba shaniah ha U Trai ki long kum u lum Seïon, u bym lah pynkhih, hynrei, u ïaineh bymjukut. PHI LAH BAN SHANIAH HA U BLEI HA KI POR BAROH NAMAR : 1. U long Uba lah ban shaniah.....(1 Thess 5:24). 2. U long U bymju kylla..................(Hebru 13:8). 3. U long Uba donbor halor baroh.....(Jeremaiah 32:17). 4. U tip lut ia kiei kiei baroh.....(Salm 147:5). 5. U don ryngkat bad phi barabor.......(Salm 139:7-10). 6. U long Uba stad tam......(Rom 11:33). 7. U long ba bha.........(Salm 34:8). 8. U long ba Iaineh........(Salm 119:90). 9. U long Uba dap da ka Jingieit......(1 Iaonnis 4:7-8). 10. U long Uba dap da ka jingisynei.....(Rom 9:15-16). Nga la shaniah ruh ha U Trai khlem da artatien (Salm 26:1). Namar kata, to ngin pynshlur ia lade ban buh ia ka jingshaniah jong ngi ha U Blei ba ngin nangroi bad ba ngin nang iai seisoh ha ka jingim jong ngi. Jingduwai: Ah! Blei ba donbor baroh, iarap ia nga ba ngan ym duh bor wat la nga hap ban iaid lyngba shibun ki jingeh bad ki jingialeh bad to nang iai pynshaitbor ia nga khnangba ngan lah ban shaniah lut ha Me bad ha ka jingialam jong Me. Amen.